Part II: Warkworth’s Chronicle


The Warkworth Chronicle: Part II


Warkworth’s Chronicle


The Coronation of Edward IV through the Elevation of William Stafford, Lord Stafford of Southwyke, to the Earldom of Devonshire in Edward’s Eighth Regnal Year.

As for alle thynges that folowe, referre them to my copey, in whyche is wretyn a remanente lyke to this forseyd werke: that is to wytt, that, at the coronacyone (2) of the forseyde Edwarde, he create and make dukes his two brythir, the eldere George Duke of Clarence, and his yongere brothir Richard Duke of Gloucetre; and the Lord Montagu (3), the Erle of Warwykes brothere, the Erle of Northumberlonde; and one William Stafford squiere, Lord Stafford of Southwyke; and Sere Herbard, Lorde Herbard, and aftere Lorde Erle of Penbroke (4); and so the seide Lorde Stafforde was made Erle of Devynschire (5); the Lorde Gray Ryffyne, Erle of Kent (7); the Lorde Bourchyer, Erle of Essex; the Lorde Jhon of Bokyngham, the Erle of Wyltschyre (6); Sere Thomas Blount (8), knyghte, Lord Mont[joy]; Sere Jhon Hawarde (9), Lorde Hawarde; William Hastynges he made Lorde Hastynges and grete Chamberlayne; and the Lorde Ryvers; Denham squyere, Lorde Dynham; and worthy as is afore schewed; and othere of gentylmen and yomenne he made knyghts and squyres, as thei hade desserved.

And also the fyrst yere of his regne he ordeyned a parleament (10), at whiche were atteynted Kynge Herry (11) and all othere that fledde with hym into Scotlonde oute of Englonde; and moche as he fande in tyme of nede grete comforth in his comyners, he ratyfied and confermyd the ffraunsches yeve to citeis and townes, &c. and graunted to many cyteis and tounes new fraunschesses (12) more than was graunted before, ryghte largly, and made chartours therof too the entent to have the more good wille and love of his londe.

Also, Quene Margrett (13), Herry Duke of Excetre, the Duke of Somersett, and other lordes (14) that fleede Englonde, hade kepte certeyne castelles in Northumberlond (15), as Awnwyk, Bambrught, Dunstonebrught, and also Werworthe, whiche they hade vytaled and stuffed bothe with Englischemenne, Frenschemenne, and Scottesmenne; by the whiche castelle[s] thei hade the moste party of alle Northumberlond. Kynge Edwarde and his counselle, thynkynge and un[der] stondynge wat hurte myghte appene therof, made commyssiones to the sowthe and west cowntre, and hade of them gret money, wyth the whiche menne made redy, and beseged the same castelle[s] in the moneth of Decembre in the yere aforseide. And Sere Peris la Brasylle (16), knyght, of Fraunce, and the best warrer of alle that tyme, was in Scotlonde to helpe Quene Margaret; when he knew that the castelles were besegede, he hade xx M{1}. of Scottesmenne, and came toward Alnwyke and alle the other castels. And whenne Kynge Edwardes hooste had knowlege that Sere Perys le Brasille with the Scottesmenne were comynge, thei remewed from the sege and were affrayd; and the Scottesche hoost supposed it hade be doone for some gayne, and thei were affrayd; also thei durst nogt come neghe the castelle; for and thei hade comyne one boldly, thei myghte have takyne and distressit alle the lordes and comeners, for thei hade lye ther so longe in the felde, and were greved with colde and rayne, that thei hade no coreage to feght, &c. Never the lattere whenne thei that were in the castelle beseged saw that the sege was withedrew for fere, and the Scottes host afferde, also thei came oute of the castelle and lefte them opene, &c.; and so afterwarde Kynge Edwardes hoost enterde into alle the hole castelle, and kept it, &c.

And after that, the castelle of Bamburght was yoldene to the Kynge, by treyatte and apoyntment by Herry the Duke of Somersett that kept it, and came in to Kynge Edwardes grace, whiche graunted him a M{1}. marke by yere, wherof he was not payede; the[r]for he departed oute of Englonde after halff yere into Scotlonde, &c. And so Kynge Edward was possessed of alle Englonde, excepte a castelle in Northe Wales called Harlake (17), whiche Sere Richard Tunstall kepte, the qwhiche was gotone afterwarde by the Lorde Harberde.

And in the thyrde yere of the reygne of Kynge Edwarde, and anno Domini M{o}.cccc.lxiij, ther was ane fervent froste thrugh Englonde, and snowe, that menne myght goo overe the yise, and a fervent colde. And also ther was holde a parleamente at Westmynster, in the whiche was graunted to the Kynge ane ayde, whiche was as moche money as the xv. parte (18) of mennys goodes and ane halff so myche more, where of the peple grocchede sore (19).

Also the iiij{e} yere of Kynge Edwarde, the Erle of Warwyke was sent into Fraunce (20) for a maryage for the Kynge, for one fayre ladye, suster-doughtere to the Kynge of Fraunce, whiche was concludede by the Erle of Warwyke. And whiles the seyde Erle of Warwyke was in Fraunce, the Kynge was wedded to Elisabeth Gray (21), wedow, the qwiche Sere Jhon Gray that was hyre housbonde was slayne at Yorke felde (22) in Kynge Herry partye; and the same Elisabeth was doughtere to the Lorde Ryvers; and the weddynge was prevely in a secrete place, the fyrst day of Maye the yere above seide. And when the Erle of Warwyke come home and herde hereof, thenne he was gretely displesyd withe the Kyng; and after that rose grete discencyone evere more and more betwene the Kyng and hym, for that and other, &c. And thenne the Kyng put oute of the Chaunceler-schepp the Bysshope of Excetre (23), brother to the Erle of Warwyke, and made the Bysshope of Bathe (24)Chaunceler of Englonde. After that the Erle of Warwyke toke to hyme in fee as many kynghtys, squyers, and gentylmenne as he myght, to be stronge; and Kyng Edwarde dide that he myght to feble the Erles powere (25). And yett thei were acorded diverse tymes: but thei nevere loffyd togedere aftere.

Also in the iiij{te} yere of the Kynge Edwarde, the monethe of Maij, the Duke of Somersett, the Lorde Roos, the Lorde Moleyns, Talboys the Erle of Kyme, Sire Phylippe Wenterworth, Sire Thomas Fynderne, gadred a grete peple of the northe contre (26). And Sere Jhon Nevelle, that tyme beynge Erle of Northumberlonde, with x.M{1} men come uppon them, and there the comons fleede that were with them, and ther the forseide lordes were takene and afterward behedede (27). But thenne the Lorde Montagu, the Erle of Warwykes brothere, whiche the Kynge had made Erle of Northumberlonde, was myghty and stronge by the same, &c. And for so moche as the Kynge and his counselle thought that he wolde holde with his Erle of Warwyke, therfor the Kyng and his counselle made the countre to desire that thei myght have the ryghtfull heyre Percy, sonne to Henry Percy that was slayne at Yorke Feld, to be the Erle of Northumberlonde; and so it was doone. And aftere this the Kynge made Lord Montagu, Marquyus Montagu, and made his sonne Duke of Bedford, whiche schulde wedde the princesse, the Kynges heldest doughter, whiche, by possibylite, schuld be Kynge of Englonde; and so he hade many fayre wordys and no lordschyppys, but alwey he promysed he wuld do, &c.

Also the same yere, and the yere of oure Lorde M{1}.cccc.lxiiij. Kynge Edwarde chaunged the coyne of Englonde (28), by whiche he hade grete getynge; for he made of ane olde noble a ryall, the whiche was commaundyde to goo for x.s.; nevere the latter the same ryolle was put viij.d. of aley, and so weyed viij.d. more by delaynge; and smote hym in to a newe prynte. Also he made of iij.d. a grote; and also he [made] angelle noblys (29) of vj.s. viij.d.., and by diverse coynes, to the grete harme of the comene peple.

Also the same yere, Kynge Herry was takene bysyde a howse of religione in Lancaschyre, by the mene of a blacke monke of Abyngtone (30), in a wode called Cletherwode, besyde Bungerly Hyppyngstones (31), by Thomas Talbott (32, 33), sonne and heyre to Sere Edmunde Talbot of Basshalle, and Jhon Talbott his cosyne of Colebry (34), withe other moo; whiche disseyvide (35), beyngne at his dynere at Wadyngtone Halle (36), and caryed to Londone on horse bake, and his lege bownde to the styrope (37), and so brought thrugh Londone to the Toure, where he was kepte longe tyme by two squyres and ij. yomen of the crowne, and ther menne; and every manne was suffred to come and speke withe hym, by licence of the kepers. (38)

And in the v{th} yere of Kynge Edwarde, the Erle of Oxenforde, the Lord Abrey his sonne, and Sere Thomas Todenam knyght, were taken, and brought into the Toure of Londone, and there was leyde to them hye tresone; and aftyrwarde thei were brought before the Erle of Worscetre, and juged by lawe padowe (39) that thei schuld be hade to the Toure Hylle, where was made a scaffolde of viij. fote hygt, and ther was there hedes smyten of, that alle menne myght see; wherof the moste peple were sory.

And in the vi. yere of Kynge Edwarde regne, the Lorde Hungerforde was takene and behedede for hye treasoune at Salisbury. And in vij. yere (40) of Kynge Edwarde, Sere Thomas Cooke, Sere Jhon Plummere, knyght, and aldermenne of Londone, and Humfrey Haward and other aldermen were arested, and treasoune surmysed uppone them, wherof thei were acquyte, but thei lost grete goodes to the Kynge, to the valowe of xl. M{1} marke or more; and diverse tymes in dyverse places of Englonde, men were arestede for treasoune, and some werre putt to dethe, and some scaped.

And in the viij. yere of the regne of Kynge Edwarde, a lytelle before Michaelmasse, there apperyde a blasynge sterre in the weste, a iiij. fote hyghe, by estymacyone in evenynge, goynge fro the weste towarde the northe, and so endurede v. or vj. wekes. And the same yere Sere Thomas Hungerforde knyght, sonne to the Lorde Hungerforde, and Herry Curtenay, the Erle of Devynschyre of ryght, were takene for treasoune and behedede(41) at Salisbury; and menne seyde the Lorde Stafforde of Southwyke was cause of the seyde Herry Curtenayes dethe, for he wolde be the Erle of Devynschyre, and so the Kynge made hym afterwarde, and [he] hade it nogt halff a yere.