Part VI: Warkworth’s Chronicle

The Warkworth Chronicle: Part VI

Warkworth’s Chronicle

Edward IV’s Return from Flanders through the Death of Henry VI and the Arrests of the Rebels in Kent

And in the secunde weke of Marche, the xlix. yere of the regne of Kynge Herry the vj{te}, and in the x. yere of the regne of Kynge Edward the iiij{te}, the same Kynge Edwarde toke his schippynge in Flaunders, and hade withe hym the Lorde Hastynges and the Lords Say, and ix. c. of Englismenne and three hundred of Flemmynges with hande-gonnes, and sailed toward Englonde, and had grete troble uppon the see with stormys, and lost a schyppe withe horse; and purpost to have londede in Northfolke, and one of the Erle [of] Oxenfordes brother withe the comons of the cuntre arose up togedere, and put hym abake to the see ageyne. And after that, at he was so trobled in the see, that he was fayne to londe in Yorkeschyre at Ravenys-spore; (1) and there rose ageyns hym alle the cuntre of Holdernes, whose capteyne was a preste, and a persone of the same cuntre called Sere Jhon Westerdale, whiche aftyrwarde for his abused disposycion was casten in presone in the Marshalse in Londone by the same Kynge Edwarde; for the same preste mett Kynge Edwarde and askede the cause of his landynge; and he answeryde that he came thedere by the Erle of Northumberlondes avyse, and schewede the Erles lettere y-send to hym, &c. undere his seale; and also he came for to clayme the Duchery of Yorke, the whiche was his inherytaunce of ryght, and so passed forthe to the cite of Yorke, where Thomas Clyfford lete hym inne, and ther he was examynede ayenne; and he sayde to the mayre and aldermenne and to alle the comons of the cite, in likewyse as he was afore at Holdernes at his landyng; that was to sey, that [he] nevere wulde clayme no title (2), ne take uppone honde to be Kynge of Englonde, nor wuld have do afore that tyme, but be excitynge and sturing of the Erle of Warwyke; and therto afore alle peple, he cryed “A! Kynge Herry!” A! Kynge and Prynce Edwarde!” and wered ane estryche feder, Prynce Edwardes lyvery. And after this he was suffred to passe the cite, and so helde his wey southwarde, and no man lettyd hym ne hurtyde hym.

Afterwarde that, he came towarde Notyngham, and ther came to hym Sere William a Stanley, with ccc. men, and Sere William Norys, and dyverse other menne and tenauntes of Lorde Hastynges, so that he hade M{1}. M{1}. menne and moo; and anone aftere he made his proclamacyone, and called hym self Kynge of Englonde and of Fraunce. Thenne toke he his wey to Leycetre, where the Erle of Warwyke and the Lard Markes his brother with iiij. m{1}. menne or moo. And Kynge Edwarde sent a messyngere to them, that yf thai wulde come oute, that he wulde feght withe them. But the Erle of Warwyke hade a letter from the Duke of Clarence, that he schulde not feght withe hym tylle he came hym self; and alle was to the distruccioon of the Erle of Warwyke, as it happenede aftyrwarde. Yet so the Erle of Warwyke kept stille the gates of the toune schet, and suffrede Kynge Edwarde passe towarde Londone; and a litelle oute of Warwyke mett the Duke of Clarence with Kynge Edward, with vij. M{1}. men, and ther thei were made acorde, and mad a proclamacion forthewithe in Kynge Edwardes name; and so alle covandes of fydelite, made betwyx the Duke of Clarence, and the Erle of Warwyke, Quene Margarete, Prince Edwarde hir sonne, bothe in Englonde and in Fraunce, were clerly brokene and forsakene of the seide Duke of Clarence; whiche, in conclusione, was distruccion bothe to hym and them; for perjury schall nevere have better ende, witheoute grete grace of God. Vide finem, &c.

Kynge Herry thenne was in Londone, and the Archebysshoppe of Yorke, withein the Bysschoppys of Londone palece. And on wennysday, next before Ester-day, Kynge Herry and the Archebysschoppe of Yorke with hym roode aboute Londone, and desirede the peple to be trew unto hym; and every manne seide thei wulde. Nevere the latter, Urswyke, recordere of Londone, and diverse aldermen, suche that hade reule of the cyte, commaundede alle the peple that were in harnes, kepynge the cite and Kynge Herry, every manne to goo home to dynere; and in dyner tyme Kynge Edwarde was late in (3), and so went forthe to the Bisshoppes of Londone palece, and ther toke Kynge Herry and the Archebisschoppe of Yorke, and put theme in warde, the thursday next before Ester-day. And the Archebysschoppe of Cawnterbury, the Erle of Essex, the Lorde Barnesse, and suche other as awyde Kynge Edwarde good wylle, as welle in Londone as in othere places, made as many menne as thei myghte in strengthynge the seide Kynge Edwarde; so then he was a viij. M{!}. menne, and ther thei refresched welle them self alle that day, and good frydai. And upone Ester evyne, he and alle his oste went toward Barnett, and caryede Kynge Herry withe hym: for he hade understondynge that the Erle of Warwyke and the Duke of Excetre, the Lorde Markes Montagu, the Erle of Oxenforde, and many other knyghtes, squyers, and comons, to the nombre of xx. M{!}., were gaderide togedere to feghte ageyne Kynge Edwarde. But it happenede that he withe his oste were enterede into the toune of Barnet, before the Erle of Warwyke and his host. And so the Erle of Warwyke and his host lay witheoute the towne alle nyght, and eche of them loosede gonnes at othere, alle the nyght. And on Ester day in the mornynge, the xiiij. day of Apryl, ryght erly, eche of them came uppone the othere; and ther was suche a grete myste, that nether of them myght see othere perfitely; ther thei faughte, from iiij. of the clokke in the mornynge unto x. of clokke the fore-none. And dyverse tymes the Erle of Warwyke party hade the victory, and supposede that thei hade wonne the felde. But it happenede so, that the Erle of Oxenfordes men hade uppon them ther lordes lyvery, bothe before and behynde, which was a sterre withe stremys, wiche [was] myche lyke the Kynge Edwardes lyvery, the sunne with stremys (4); and the myste was so thycke, that a manne myghte not profytely juge one thynge from anothere; so the Erle of Warwikes menne schott and faughte ayens the Erle of Oxenfordes menne, wetynge and supposynge that thei hade bene Kynge Edwardes menne; and anone the Erle of Oxenforde and his menne cryed “treasoune! treasoune!” and fledde awaye from the felde withe viij. c. menne. The Lorde Markes Montagu was agreyde and apoyntede with Kynge Edwarde, and put uppone hym Kynge Edwardes lyvery; and a manne of the Erles of Warwyke sawe that, and felle uppone hyme, and kyllede hym. And whenne the Erle of Warwyke saw his brothere dede, and the Erle of Oxenforde fledde, he lepte one horse-backe, and flede to a wode by the felde of Barnett, where was no waye forthe; and of of Kynge Edwardes menne hade espyede hyme, and one came uppone hym and kylled hym, and dispolede hyme nakede. And so Kynge Edwarde gate that felde. And ther was slayne (5) of the Erle of Warwykes party, the Erle hym self, Markes Montagu, Sere William Tyrelle, knyghte, and many other. The Duke of Excetre faugth manly ther that day, and was gretely despolede and woundede, and lefte nakede for dede in the felde, and so lay ther from vij. of the clokke tille iiij. after none; whiche was take up and brought to a house by a manne of his owne; and a leche brought to hym, and so afterwarde brought in to sancuarij at Westmynster. And one Kynge Edwardes party was slayne the Lorde Cromwelle, sonne and heyre to the Erle of Essex, Lord Barnes sonne and heyre (6), Lord Say (7), and dyverse other, to the nombre (of bothe partys) iiij. M{1}. menne. And after that the felde was don, Kynge Edwarde commaundyd bothe the Erle of Warwikes body and the Lorde Markes body to be putt in a carte, and returned hym with alle his oste ageyne to Londone; and there commaundede the seide ij. bodyes to be layede in the chyrche of Paulis, one the pavement, that every manne myghte see them; and so they lay iij. or iiij. days, and afterwarde where buryede. And Kynge Herry beynge in the forwarde durynge the bataylle, was not hurt; but he was broughte agayne to the Toure of Londone, ther to be kept.

And Quene Marget, and Prince Edwarde hire sonne, with other knyghtes, squyers, and other menne of the Kyng of Fraunce, hade navy to brynge them to Englond: whiche, whenne thei were schipped in Fraunce, the wynde was so contrary unto them xvij. dayes and nyghtes, that [thei] myght not come from Normandy with unto Englonde, whiche with a wynd myght have seylede it in xij. oures; whiche at the xvij. dayes ende one Ester day at the eveyne the[i] landed at Weymouthe, and so by lande from Weymouthe the[i] roode to Excetre; and mette withe hire, at Weymouth, Edmunde Duke of Somersett, the Lorde Jhon his brother, brother to Herry Duke of Somerset slayne at Exham, and Curteney the Erle of Devynschyre, and many othere. And on Ester mounday was brought tithyngys to them, that Kynge Edwarde hade wonne the felde at Batnett, and that Kynge Herry was put into the Toure ayene (8). And anone ryghte thei made out commaundementes, in the Quenes name and the Prynce, to alle the weste countre, and gaderet grete peple (9), and kepte hire wey towarde the toune of Brystow. And when the Kynge herd that thei were landede, and hade gaderede so myche peple, he toke alle his hoste, and went oute of Londone the wennysday in Ester weke, and manly toke his waye towarde them; and Prynce Edwarde herd therof; he hastede hym self and alle his oste towade the towne of Glouceter, but he enteryd nogt into the towne, but held forthe his wey to the towne of Teukesbury, and ther he made a felde(10) nogt ferre from the ryver of Saverne; and Kynge Edwarde and his oste came uppone hym, the saturday the fourth day of Maij, the yere aforedeide of oure Lorde M{1}.cccclxxj., and the xj yere of Kynge Edwarde. And Edmunde Duke of Somersett, and Sere Hugh Curteneye, went oute to the felde, by the whiche the felde was broken; and the moste parte of the peple fledde awaye from the Prynce, by the whiche the feld was loste in hire party. And ther was slayne (11) in the felde, Prynce Edward (12), whiche cryede for socoure to his brother-in-lawe, the Duke of Clarence. Also ther was slayne, Curteney the Erle of Devynschyre, the Lorde Jhon of Somersett, the Lorde Wenloke, Sere Edmunde Hampden, Sere Robart Whytyngham, Sere William Vaus, Sere Nicholas Hervy, Sere Jhon Delvis, Sere William Feldynge, Sere Thomas Fiztharry, Sere Jhon Leukenore, knyghtes; and these were taken and behedede afterwarde, where the Kynge hade pardoned them in the abbey cherche of Teukesbury, by a prest that turnyd oute at his messe and the sacrament in his handys, whanne Kynge Edwarde came with his swerde into the chirche, requyrede hyme by the vertu of the sacrament that he schulde pardone alle tho whos names here folowe; the Duke of Somersett, the Lorde of Seynt Jhones, Sere Humfrey Audeley, Sere Gervis of Clyftone, Sere William Gremyby, Sere William Cary, Sere Thomas Tresham, Sere William Newburgh, knyghtes, Herry Tresham, Walter Curtenay, Jhon Florey, Lowes Myles, Robart Jacksone, James Gowere, James Delvis, sonne and heire to Sere Jhon Delvis; whiche, uppon trust of the Kynges pardone yevene in the same chirche the saturday, abode ther stille, where thei myght have gone and savyd ther lyves; whiche one monday aftere were behedede (13), nogtwhitstondynge the Kynges parone (14). And afterward these ladyes were takene,–Quene Margaret, Prynce Edwardes wyf, the secunde dowghtere of the Erle of Warwykes, the Countasse of Devynschire, Dame Katherine Vaus. And these were taken, and nogt slayne; Sere Jhon Fortescu, Sere Jhon Sentlow, Sire Herry Roos, Thomas Ormonde, Doctour Makerell, Edward Fulforde, Jhon Parkere, Jhon Bassett, Jhon Wallys, Jhon Thromerre Throgmertone, and dyverse other men. And there was takene grete good, and many good horse that were brought frome beyond the see.

And in the same tyme that the batelle of Teukesbury was, Sere Watere Wrotty[s]e and Geffrei Gate, knyghtes of the Erle of Warwykes, were governers of the towne of Caleys, dide send Sire George Broke knyght oute of Caleys, with ccc. of soudyours unto Thomas Bastarde Fakynebrygge, that was one the see with the Erle of Warwykes navy, that he schulde the navy save, and goo into Kent, and to reyse alle Kent, to that entente to take Kynge Herry oute of the toure an distroye Kyng Edwarde, yf he myghte; whiche Bastarde came into Kent, to Caunterbury, and he, withe helpe of other gentylmenne, thei reysed up all Kent, and came to Londone the v. day of Maij the yere aforeseide. But thenne the Lorde Scales, that Kynge Edwarde hade lefte to kepe the cyte, with the Meyre and Aldermen, wulde nogt suffre the seid Bastarde to come into the cite; for thei had understondynge that Prince Edwarde was dede, and all his hoste discomfytede: wherefor the Bastarde loosede his gonnes into the citee, and brent at Algate and at Londone brygge (15); for the whiche brynnynge, the comons of Londone were sore wrothe, and gretely mevyd ayens them: for and thei had nogt brent, the comons of the cyte wulde have leett them in, magre of the Lorde Scales hede, the Mayre and all his brethyr. Wherefor the Bastarde and all his hoste went overe at Kyngstone Brygge, x. myle westwarde, and hade purposed to have distruyt Kynge Edwarde, or to have dryve hym oute of the londe. And if the Bastarde hade holde forthe his way, Kynge Edwarde be possibilyte coude nogt be powere haf recisted the Bastarde; for the Bastarde had moo then xx. M{1}. goode men welle harnessede, and evere as he went the peple felle to hym. The Lorde Scales, and dyverse othere of Kynge Edwardes counselle that were in Londone, sawe that the Bastarde and his oste went westwarde, and that it schuld be a grettere juperdy (16) to Kynge Edwarde thenne was Barnet felde or Teukesbury felde (in so moche when the felde of Teukesbury was done, his oste was departeded from;) wherefor thei promysed to the Bastarde, and to dyverse other that were aboute hym, and in especyalle to one Nicholas Fauntt, Meyre of Caunterbury, that he schulde entret hym to turne homwarde ageyn. And for as myche as fayre wordes and promyses makes fooles fayne (17), the Bastarde commaundede alle his oste to turne to Blakhethe ageyn; whiche was distruccion of hyme self and many othere; for anone after, by the Duke of Gloucetre in Yorkeschyre, the seide Bastarde was behedede (18), nogt withstondynge he hade a chartere of pardone; and Nicholas Fauntt was afterward hangede, drawene, and quarterede in Caunterbury. And whene the Bastarde and all his oste were come to Blakhethe ageyne, the next mornynge he withe the soudyours and schypmen of Caleis, to the nombre of vj. c. horsemen, stole awaye frome the ost and roode to Rouchester, and frome thens to Sandwyche, where the Bastarde abode the Kynges commynge, and the soudyours saylede overe see to Caleys. And whenne the oste understode that ther Capteyne was stole from them, thei kepte them togedere alle a daye and a nyght, and thanne every manne departede to his own howse. And when Kynge Edward herde thereof, he was gladde, &c.

Here is to know that Kynge Edwarde made oute commyssyons to many schyres of Englonde; whiche in a x. dayes ther came to hym, where he was, to the nowmbre of xxx.M{1}., and came withe the Kynge to Londone, and ther he was worschipfully receyvid (19). And the same nyghte that Kynge Edwarde came to Londone, Kynge Herry, beynge inwarde in presone in the Toure of Londone, was putt to dethe (20), the xxj. day of Maij, on a tywesday nyght, betwyx xj. and xij. of the cloke, beynge thenne at the Toure the Duke of Gloucetre, brothere to Kynge Edwarde, and many other; and one the morwe he was chestyde and brought to Paulys, and his face was opyne that every manne myghte see hyme; and in hys lyinge he bledde one the pament ther; and afterward at the Blake Fryres was broughte, and ther he blede new and fresche; and from thens he was caryed to Chyrchesey abbey in a bote (21), and buryed there in oure Lady chapelle. On the morwe that the Kynge was come to Londone, for the goode servyse that Londone hade done to hym, he made knyghtes of the Aldermenne, Sere Jhon Stokstone, Sire Rauf Verney, Sere Richard Lee, Sere JhonYonge, Sere William Tayliour, Sere George Irlande, Sere Jhon Stokere, Sere Mathew Philyppe, Sere William Hamptone, Sere Thomas Stalbroke, Sere Jhon Crosby, Sere Thomas Urswike, Recordere of Londone (22). And after that, the Kynge and alle his oste roode into Kent to Caunterbury, where many of the countre that were at Blakhethe withe the Bastarde, were arestede and brought befor hym; and ther was hangyd, drawene, and quarteryd, one Fauntt of Caunterbury (23), that was lovynge to the Erle of Warwyke; whyche entreytede the Bastarde for to departe frome his oste; and many dyverse menne of the cuntre were hanged and put to dethe. Aftere that, the Kynge roode unto Sanwyche, and beside all the Erle of Warwykes navy ther, and that the Bastarde hade reule of, and toke the Bastard withe hyme, and returned ageyne to Londone. And immediately after that was the Lorde Denham and Sere Jhon Fog and dyverse othere made commyssiooners, that satt uppone alle Kent, Sussex, and Essex, that were at the Blakhethe, and uppone many othere that were nogt there; for some manne payed cc. marke, some a c. pownde, and some more and some lesse, so that it coste the porest manne vij.s. whiche was nogt worthe so myche, but was fayne to selle suche cothinge as thei hade, and borrowede the remanent, and laborede for it afterwarde; and so the Kynge hade out of Kent myche goode and lytelle luff. Lo, what myschef groys after insurreccion! &c.